مقارنه بين التيدا والجوك

واليكم المقارنه:

1- من حيث الشكل:

طبعا ده اذواق لكن انا عن نفسي بحب وش التيدا عن ظهرها وده طبعا في السيدان لكن في الهاتش باك انا بحب ظهر ال 2009 وال 2010 عن 2011 و2012 لان شكل الفانوس الخلفي اشيك بكتير

اما الجوك زي ما قولت عنها ان انها لازم تتشاف اكتر من مرة عشان تاخد على شكلها الغريب وخصوصا من الامام لكن من الخلف انا شايف ان شكلها جميل جدا

وموضوع الشكل ده راي شخصي بحت يعني ممكن توافقوني او تخالفوني فيه

2- الجلوس داخل السيارة :

الكرسي في التيدا اكبر شويه من كرسي الجوك عشان كده بحس انه اكثر راحه من الجوك ولكن ليس معني هذا ان الجوك غير مريحه بالعكس الجوك كرسيها جميل جدا ولكن انا بحس ان التيدا كرسيها اكثر راحه انما الجوك تحس ان قعدتها رياضيه نوعا ما وكمان حسيت ان دريكسيون الجوك اصغر من التيدا وده من وجهه نظري ممتاز جدا عشان اكتمال الاحساس الرياضي في الجوك

3- الاتساع الداخلي: 

هو في صالح التيدا بشكل ملحوظ وخصوصا من الخلف ولكن انا عايز اقول انه اصلا صعب تقارن اتساع التيدا مع اي عربيه تانيه خالص لان انا بعتبر ان معادله صالون التيدا دي من حيث الاتساع مش هي الاستاندرد لان نيسان فعلا عملت طفرة في اتساع الصالون بتاع التيدا بالرغم من صغر حجم العربيه من الخارج يعني عشان تقدر تلاقي صالون واسع زي التيدا عايز عربيه حجمها قد التيدا مرة ونص من برة والجوك طبعا كعربيه رياضيه في الشكل فكان لازم ده يجي على حساب الاتساع الداخلي وان كان ليس بهذا السوء ولكن نقدر نقول ان الكنبه الخلفيه في الجوك تاخد اتنين متوسطي الحجم مرتاحين وتلاته مش مرتاحين قوي يعني

4- شكل التابلوه:

رايي التيدا عربيه كلاسيك تابلوهها جميل وبسيط اما تابلوه الجوك فانا شايف بالرغم من صغر حجمه الا انه شيك جدا جدا وتحس ان كل زرار فيه في مكانه ومكانش ينفع يكون في غير المكان ده وانا شايف ان نيسان كانت موفقه في تصميم تابلوه الجوك جدا وهو عجبني جداجدا

5- الكماليات الداخليه :

الجوك تتفوق بوضوح عن التيدا من حيث الكماليات وفعلا اول مرة احس ان في عربيه بتنزل من غير ما يتشال منها حاجه عشان ترخص في السعر يعني مثلا انا حاسس في التيدا ان كان لازم يبقى فيها كروز كنترول ومرايات ضم مثلا عشان تحس باكتمال المظهر الداخلي للعربيه مع الكماليات ولكن مع الجوك الاحساس مختلف كل حاجه موجوده في مكانها وما فيش حاجه ناقصه من وجهه نظري غير فتحه سقف وده طمع طبعا بس كان ها يخللي العربيه الجوك تحفه فعلا

6- من حيث القياده:

اولا العاديه: 

الاداء متقارب نوعا ما مع تميز الجوك في النعومه عشان ما فيش احساس النقله الخفيف اللي موجود في التيدا

ثانيا الرياضي: 

طبعا نتيجه اختلاف نوع الفتيس في العربيتين وعشان فتيس الجوك مهما عملت بيحافظ على الموتور عشان مش ممكن ها تقدر تخليه يدخل في منطقه الريد زون فالاداء في الجوك جيد وليس ممتاز ولكن في التيدا عشان بتقدر تسقط نقلات بالفتيس فا بتقدر تخرج كل طاقه العربيه لحد ما توصل للريد زون طبعا مع الوضع في الاعتبار ان ده مضر على الفتيس وكمان لازم نحط في دماغنا ان الفتيس السي في تي في الجوك مش فتيس رياضي اصلا وكمان فرق الوزن اللي هو مش كبير قوي ( حوالي 85 كيلو ) وكمان الجنط ال 17 ومقاس الكاوتش الكبير في الجوك

7- الثبات: 

لصالح الجوك طبعا عشان مقاس الجنط والكاوتش العريض وكمان نظام الثبات الالكتروني اللي موجود في الجوك انما التيدا لا فيها ثبات الاكتروني ولا كاوتش عريض بس ثباتها مش ضايع يعني

8- الفرامل: 

في التيدا الفرامل جيده والجوك الفرامل ممتااااااااااااازة وطبعا ده راجع لان الجوك ورا وقدام سكاكين مع عرض الكاوتش فالعربيه مكلبشه في الارض اما التيدا ورا مش سكاكين وهما الاتنين فيهم ايه بي اس وايه بي دي بس اداء الفرامل عموما بيكون احسن لما قدام ووراء بيكون سكاكين

9- العفشه: 

العربيتين تعليقهم واحد من قدام ماكفيرسون ومن ورا تروجان بيم ولكن عفشه الجوك انشف بشكل خفيف جدا قد لا يلاحظ اصلا وده راجع لكبر حجم الكاوتش في الجوك اللي بيساعد في امتصاص الصدمات

10- العزل:

تقريبا متساوي في الاتنين

وفي النهايه ارجو اكون قدرت اعمل مقارنه بين التيدا والجوك بشكل حيادي مع الوضع في الاعتبار ان برضو ده راي شخصي ممكن يتفق او يختلف مع اراء اخرى

وانا تحت امركم في اي اسئله ما دمت اعرف اجابتها

شكرا