شرح لشروط وواجبات الضمان لسيارات نيسان (منقول)

منقول من موقع السبع اوتو سيرفس للافادة

ماذا يشمل الضمان

ان شركة نيسان تضمن السيارات الجديدة 36 شهر او100.000كم ايهما اسبق ، حيث يقوم وكيل نيسان المرخص بتصليح او استبدال اية قطعة غيار على السيارة التى ثبتت عدم صلاحيتها مجانا ، علما بأن فترة الضمان على قطع الغيار الممنوحه للقطع المباعة والمركبة بواسطة احد مراكز خدمتنا المعتمده هى 3 أشهر او 5.000كم ايهما اسبق .

غير مشمول بالضمان

1- الاطارات مشموله بضمان مستقل

• 2- تركيب قطع غيار او اكسسوارات غير اصليه خارج اعمال نيسان
• 3- اى قطع او مصاريف عماليه تتصل مع المطلوب او خدمات الصيانه الموصى بها
• 4- العطل والفشل الناتج عن:
  • *سوء الاستعمال ، الحوادث ، السرقه او الحريق
  • *الاستعمال الخاطئ او الوقود الوسخ اوالسوائل او الشحوم الرديئه
  • *نقص الاداء فى خدمات الصيانه الصحيحه
  • *استعمال قطع نيسان غير اصليه
  • *شظايا الاحجار ، التساقط الكيماوى ، عصارة الاشجار ، الاملاح، البرد او الظروف البيئيه الاخرى
  • *الاصلاحات التى لم يتم انجازها بواسطة وكيل نيسان المرخص
• 5- التلف العادى للتنسيق او الطلاء او مواد المظهر الخارجى الاخرى
• 6- اية سياره تتغير فيها قراءة الاودوميتر الى درجة يصعب بها تحديد الكيلومترات
• 7- التلف الطارئ او العرضى مثل الزجاج
• 8- حالة فقدان استعمال السياره ، او تصبح غير ملائمه او فقدان قيمتها التجاريه
• 9- التعويض عن: (نقل السياره الى مركز الصيانة المعتمد للاصلاح ، تكلفة ايجار سيارة العميل ، تكلفة السفر ، المكالمات التليفونيه ، الوقت ، تعطيل المعاملات التجارية ، تكلفة سياره بديلة ، الاضرار النفسية وتكلفة الفرص البديلة)

ماهو دور الوكيل المعتمد

• 1- تتم تصليحات الضمان مجانا ( باستثناء البطاريات، يجب عليك دفع قيمه معينه )
• 2- خدمة الفحص المجانى عند بلوغ 1000كم، باستثناء السوائل اوالزيوت او مصاريف استبدال مرشح الزيت

معلومات حول الاطار

تكون الاطارات المركبه اصلا فى سيارة نيسان الجديده مضمونه بواسطة مصنع الاطار، لغرض الحصول على خدمة ضمان الاطار يجب عليك احضار الاطار الى وكيل الاطارات المحلى

أشياء يجب عليك معرفتها عن ضمان سيارة نيسان الجديدة

*غاز التبريد لمكيف الهواء :

اعادة شحن غاز التبريد والذى يكون غير مرتبط بالاصلاح يكون مغطى فقط اثناء 12 شهرا الاولى

*البطارية الاصليه للسياره:

تكلفة قطع الغيار:

البطاريه الاصلية والتى تكون غير صالحه للعمل خلال12 شهرا الاولى سيتم استبدالها بدون اى تكلفه ، بعد 12 شهر ولكن ضمن 24 شهر سوف تدفع نيسان 50% من قيمة البطارية ، بعد 24 شهر ولكن ضمن 36 شهر سوف تدفع نيسان 25% من قيمة البطارية

أجرة العامل:

جميع العمال المطلوبين لاختيار وتبديل البطاريه التالفة ضمن 36 شهر تكون مشمولة بالضمان .

Read More

مواصفات زيوت و سوائل نيسان تيدا الشكل القديم الموصى بها من المصنع للموتور HR16DE

يقدمه لكم (أحمد ابراهيم)

دي نسب و كميات الزيوت و السوائل و مواصفاتها للنيسان تيدا

و احنا طبعا موتور التيدا اللي هنا HR16DE

و الوثيقة السابقة بتوضح ان :-

- سعة تانك الوقود 50 لتر.

- بتاخد زيت موتور 3.0 لتر بالفلتر و 2.8 من غير فلتر.

- سائل تبريد (ميه خضرا) 6.3 لتر بنسب خلط 30% مادة و 70% ماء مقطر.

- ناقل الحركة (الفتيس) اليدوي بياخد مواصفة زيت GL-4 بلزوجة 75-85 W.

- ناقل الحركة الوتوماتيك بياخد زيت ATF Nissan Matic D.

- زيت الفرامل DOT 3.

دي بتشرح درجة لزوجة الزيت طبقا لدرجة حرارة الجو و عندنا هنا افضل حاجه ليها 10-40 و لو طبعا 5-40 هيبقى ينفع في الصيف و الشتاء القارص كمان

Read More

تقييم قياده النيسان سنترا 2015 --- بسام محمد حافظ

بسم الله الرحمن الرحيم

مقدمه لكم : بسام محمد حافظ 

السلام عليكم ورحمه الله وبركاته اعضاء جروب نيسان تيم ايجيبت الكرام 

اولا ادعو الله ان يوفقني في تقييم السياره نيسان سنترا بشكل محايد دون التحيز او اتذمر الى او من اي تفصيله في السياره 

ثانيا خبرة التقييم الحمد لله وفقني الله لاقتناء نيسان تيدا 2010 اوتوماتيك  لمده سنتين ونيسان جوك اوتوماتيك  2012 لمده سنه ونص

ثالثا نبدا التقييم وانا مش ها استعمل صور لانها كلها موجوده على الجروب وها اكتفي بسرد التقييم اجمالا وتفصيلا:

1- تفصيلا:

- شكل السياره من الخارج:

 العربيه بشكل عام شكلها حلو ومقبول وخطوطه متناسقه مع بعض سواء من الامام اوالخلف او الجانب ولكن لو بصينا على تفاصيل العربيه ها نلاقي ان التصميم مش جديد وممكن كمان يكون في تشابه في بعض تفاصيل التصميم مع بعض العربيات الاخري زي الكورولا الشكل اللي قبل الاخير في الفوانيس الخلفيه والالنترا في المرايات الجانبيه والصني  الفيس ليفت من الامام وده مش بيعيب العربيه وزي ما قولنا العربيه في المجمل متناسقه وحلوه وحجمها من بره كويس

- المساحه الداخليه :

 العربيه مساحتها الداخليه متناسقه تماما مع شكلها الخارجي يعني لما تشوفها من بره بتبقى متوقع مساحه الصالون من جوه زي ما بتشوفه فعليا على عكس التيدا زمان كنت تشوفها تفتكرها صغيره ومساحتها من جوه بتفاجاك اما في السنترا حجمها من جوة زي بره المساحه الاماميه ممتازه ومن الخلف مساحه الارجل ممتازه ولكن في العرض تاخد اتنين باي حجم مرتاحين جدا وممكن تاخد واحد تالت كماله عدد بس مش ها يكون مرتاح قوي عشان ارتفاع الكنبه نسبيا من النص وكمان عشان فتحه التكييف الخلفي ها تضايق اللي قاعد في النص نسبيا في المجمل العربيه ممتازه ومريحه جدا لاربع اشخاص اتنين في الامام واتنين في الخلف وشنطه العربيه مساحتها كويسه جدا

- خامات السياره :

 خامات العربيه ليست بالممتازه ولكنها جيده جدا جدا جدا والتقفيل جيد جدا

- كماليات السياره :

 العربيه مش خارقه في الكماليات ولكن نقدر نقول ان اللي موجود يحسسك نسبيا بالرضا يعني في عربيات بيبقى فيها كماليات ممكن ما تستخدمش لحد ما تبيع العربيه ولكن على الرغم من قله كماليات السنترا الا انها من اهم واحسن الكماليات الضروريه في العربيه زي الاستارت انجين والكي لس انتري وزي المالتي فانكشن بس كان يبقص العربيه دي التكييف التاتش يعني وجود التكييف المانيوال جنب الاستارت انجين تخليك تحس ان في حاجه غلط بس في المجمل الكماليات مقبوله

- قياده العربيه وعزلها والعفشه:

 قياده العربيه مريحه جدا مع الباور الكهربا وصغر حجم الدريكسيون يحسسك انك سايق عربيه اصغر من حجمها الطبيعي مش عارف دي ميزه ولاعيب بس فعلا اول ما جلست على كرسي السائق ومسكت الدريكسيون حسيت ان اني سايق عربيه اصغر حجما - المرايات الجانبيه ليست سيئه ولكنها نسبيا صغيره على حجم العربيه من وجه نظري ليس من حيث التصميم ولكن من حيث الرؤيه - عزل العربيه ممتاز انت ماشي مش حاسس بدوشه الطريق خالص -  عفشه العربيه مش ناعمه ومش ناشفه بس هى ناشفه حاجه بسيطه قوي عشان تساعد على ثبات العربيه في ظل ارتفاعها عن الارض

- اداء السياره على الطريق:

 العربيه في القياده الهاديه ممتعه جدا لاقصى درجه من حيث النعومه وهدوء الموتور والفتيس الس في تي اللي مخليك حاسس انك حاطط العربيه على النورمال وسايبها تنزل منزل خفيف لوحدها فعلا احساس ممتاز ولكن في عز الجو الرومانسي الهادي ده والروقان ده لو حسيت انك عايز تاخد غرزه فجائيه او تشد شدايه كده مع واحد مش عارف قيمه عربيتك وعايز تعرفه مقامه ها تحس انك زي ماتكون دخلت على مراتك المطبخ وهي مش واخده بالها ورحت خاضضها عشان تهرج معاها اخص عليك يا محمد خضتني وبعد كل ده ها تجري العربيه شويه وممكن تحس شويه بالموتور اللي معاك طبعا انا مش بزم في العربيه بس لما انا اقرا ان الموتور ده 118 حصان وعزمه 156 نيوتن لازم يكون اداءه مختلف خالص عن الوضع الواقعي في العربيه دي والعيب هنا مش في الموتور للاسف المشكله ان الفتيس مهدر من قوة الموتور في الطلعه بالذات وخصوصا ان العربيه وزنها 1218 كيلو غير اللي راكب فيها - انا مش عايز حد يفهم اني بزم في العربيه بس الفكره ان الفتيس السي في تي ليه مزايا زي النعومه وتوفير البنزين بس قصاد ده خسر ميزه الحرق على النقله في الفتيس الاوتو العادي وعلى فكره العربيه دي ممكن تجيب لحد 180 بس مش وانت بتشد مع حد ولكن لازم العربيه تكون براحتها ومن وجهه نظري بما ان الفكر رايح للسي في تي فلازم يتم تطويره بشكل يعوض الحته بتاعه تهدير العزم بالذات من الصفر لان الفتيس ده بقى في عربيات كتير زي الرينو والتويوتا والسوبارو

2-التقييم المجمل للعربيه :

العربيه جميله جدا وتستاهل فلوسها الحاليه اللس هي 165 او 175 ولو زادت جنيه يبقى العربيه خسرت القيمه مقابل السعر وهي صفقه رابحه لمن يشتريها وتناسب فئه الاباء اكتر من الابناء او بمعني اصح هي فئه لا تناسب الشباب اكتر ما تناسب الفئه العمريه الاكبر

ارجو اني اكون قدمت حاجه تفيد ولا تضر وبشكل محايد  وفي النهايه ده تقييم شخصي من وجهه نظري الشخصيه لفتره تجربه للعربيه لا تتعدي ال 20 دقيقه

والى اللقاء في تيست اخر لسياره اخرى

Read More

تقرير مفصل عن نيسان سنترا 2015 --- أحمد ابراهيم

تقرير مفصل عن نيسان سنترا 2015

تقرير يقدمه  ( أحمد ابراهيم)

تعتبر السيارة نيسان سنترا من احد احدث سيارات شركة نيسان العريقة التي تقتحم بها الاسواق المصرية.

عندما ترى السيارة لأول وهلة يأسرك شكلها الخارجي الانسيابي والشبكة الامامية الكبيرة التي توحي بقوة المحرك خلفها وكذلك الخطوط الخارجية المرتفعة و حجم المصابيح الامامية الكبير الذي تتوج بانوار LED اسفلها ليعطيها ملامح رياضية بعض الشيء مع احتفاظها بطابعها العائلي.

السيارة متوفرة بفئتين الفئة العاديه بسعر 165 الف و الفئة الكاملة بسعر 175 الف جنيه بزيادة سبويلر و جنوط و زر بدء تشغيل Start Engine و حساسات اصطفاف خلفية Parking Sensor و كذلك مقود متعدد الوظائف -Multi Function و اضائة الشبورة واشارات بالمرايات .

و فيما يلي سنتناول تفاصيل السيارة

اولا : المساحة الداخلية و الرفاهيه

• من مميزات سنترا انها تتميز بمساحة داخليه كبيره حيث انها تتسع لاربعة اشخاص كبار الحجم او خمسة اشخاص متوسطي الحجم كما تلاحظ وجود مسافه كبيره بين الكرسي الامامي و الكنبه الخلفيه مما يعطي احساسا للركاب  بالراحة.
•  اول ما يلفت النظر بهذه السياره هو الفرش المخملي للكراسي و الابواب و مخادع اليد المبطنه و مسند لليد يتوسط الكنبه الخلفيه يحتوى على حامل اكواب وفتحة يمكن فتحها في حالة رغبة احد الركاب في ان يجلب غرضا من شنطة السيارة دون الحاجه لايقاف السيارة.
• تحتوي السياره ايضا على نظام اضائه داخلية للركاب الامايين به 2 لمبة قرائة للركاب الاماميين وللركاب الخلفيين لمبة صالون تتوسط سقف السيارة.
• تتميز ايضا بعزل داخلي جيد جدا يفصلك تماما عن العالم الخارجي و ضجيج الطريق. 
• مقابض الابواب من النيكل كروم و تحتوي على اماكن تخزينيه متعدده و كذلك جراب نظاره فوق المرايه الوسطى للسيارة
• لون فرش السيارة هو الرمادي الفاتح
• تلاحظ ان المقود و ناقل الحركه مغطيان بالجلد المتناسق مع لون فرش السياره

ثانيا : قوة المحرك

تتميز السيارة سنترا بمحرك HR16DE  يزأر بقوة 112 حصان على 4000 لفة بعزم 142 نيوتين متر كما يتيمز ايضا انه يتمتع بخاصيتين تعطيه سلاسة و قوة و سرعة رد فعل الا و هما انه Duel Port Injection و هي تقنية اعتمدتها نيسان في انه كل اسطوانة مركب عليها اثنين حاقن وقود و كذلك تقنية نيسان المميزه الجديد CVTC  الا وهي التغيير المستمر في توقيت الكامات طبقا لحالة المحرك و كذلك القوة و التسارع المطلوبين (Continuous Variable Valve Timing Control)

ثالثا : ناقل الحركة

تتوفر السيارة سنترا بناقل حركة اوتوماتيك من نوع Xtronic CVT الموجود حاليا بمعظم سيارات نيسان و لكن احسست عند قيادة السيارة ببطء نسبي في تسارع السيارة عند التحرك من الثبات 
كما متوفر به خاصية ال Sport Mode لمحبي القيادة السريعه

رابعا : وسائل الامان

تتميز بوسائل امان متعددة كعادة نيسان و هي عدد 2 ايرباج امامي و كذلك نظام الفرامل مزود بتكنولوجيا ABS الفرامل المضادة للانغلاق  و تكنولوجيا  EBD  و هي التوزيع الاليكتروني لقوة الفرامل على العجلات و كذلك تكنولوجيا BA  وهي مساعدة الفرامل الاليكترونية و التي تساعد في زيادة سرعة رد فعل الفرامل عند الطوارئ

كذلك  الكنبة الخلفية مزودة بعدد 3 حزام امام

خامسا : الثبات

الثبات من الفئة المتوسطه حيث ان السيارة مرتفعة عن الارض كما نلاحظ و لكنها جيدة جدا في المناورة و كما انها ايضا لا تحتوي على نظام الثبات الاليكتروني

و نحب ان نذكر ان نظام التعليق الامامي نظام Mc Pherson و الخلفي Torsion Beam دنجل متصل

سادسا : الكماليات

• التكييف يتم التحكم فيه يدويا و به 9 مخارج منهم مخرجين خلفيين للركاب الخلفيين يمكن التحكم من فتحه و غلقه
• السيارة تحتوي على 4 سماعات داخلية و كاسيت CD/Radio/MP3/WMA/USB و تتميز ايضا بنقاء شديد للصوت
• مقود السيارة به ازرار للتحكم بنظام الصوت Muti Function
• تحتوي على كمبيوتر رحلات يتوسط طابلوه السيارة
• العدادات الداخلية تنير بالنور الابيض و يتخللها اللونين الاحمر و الازرق
• المرايات الجانبية تحتوي على اشارات مضيئة
• التحكم الكامل في الابواب بدون مفتاح Key LESS Entry
• مفتاح Start Engine 
• فتح الشنطة من الخارج و الداخل بدون مفتاح 
• اسبويلر خلفي مضيء به لمبة توقف
• باركينج سينسور مدمج
• تحكم في مستوى الاضائة

Read More

مقارنه بين التيدا والجوك

واليكم المقارنه:

1- من حيث الشكل:

طبعا ده اذواق لكن انا عن نفسي بحب وش التيدا عن ظهرها وده طبعا في السيدان لكن في الهاتش باك انا بحب ظهر ال 2009 وال 2010 عن 2011 و2012 لان شكل الفانوس الخلفي اشيك بكتير

اما الجوك زي ما قولت عنها ان انها لازم تتشاف اكتر من مرة عشان تاخد على شكلها الغريب وخصوصا من الامام لكن من الخلف انا شايف ان شكلها جميل جدا

وموضوع الشكل ده راي شخصي بحت يعني ممكن توافقوني او تخالفوني فيه

2- الجلوس داخل السيارة :

الكرسي في التيدا اكبر شويه من كرسي الجوك عشان كده بحس انه اكثر راحه من الجوك ولكن ليس معني هذا ان الجوك غير مريحه بالعكس الجوك كرسيها جميل جدا ولكن انا بحس ان التيدا كرسيها اكثر راحه انما الجوك تحس ان قعدتها رياضيه نوعا ما وكمان حسيت ان دريكسيون الجوك اصغر من التيدا وده من وجهه نظري ممتاز جدا عشان اكتمال الاحساس الرياضي في الجوك

3- الاتساع الداخلي: 

هو في صالح التيدا بشكل ملحوظ وخصوصا من الخلف ولكن انا عايز اقول انه اصلا صعب تقارن اتساع التيدا مع اي عربيه تانيه خالص لان انا بعتبر ان معادله صالون التيدا دي من حيث الاتساع مش هي الاستاندرد لان نيسان فعلا عملت طفرة في اتساع الصالون بتاع التيدا بالرغم من صغر حجم العربيه من الخارج يعني عشان تقدر تلاقي صالون واسع زي التيدا عايز عربيه حجمها قد التيدا مرة ونص من برة والجوك طبعا كعربيه رياضيه في الشكل فكان لازم ده يجي على حساب الاتساع الداخلي وان كان ليس بهذا السوء ولكن نقدر نقول ان الكنبه الخلفيه في الجوك تاخد اتنين متوسطي الحجم مرتاحين وتلاته مش مرتاحين قوي يعني

4- شكل التابلوه:

رايي التيدا عربيه كلاسيك تابلوهها جميل وبسيط اما تابلوه الجوك فانا شايف بالرغم من صغر حجمه الا انه شيك جدا جدا وتحس ان كل زرار فيه في مكانه ومكانش ينفع يكون في غير المكان ده وانا شايف ان نيسان كانت موفقه في تصميم تابلوه الجوك جدا وهو عجبني جداجدا

5- الكماليات الداخليه :

الجوك تتفوق بوضوح عن التيدا من حيث الكماليات وفعلا اول مرة احس ان في عربيه بتنزل من غير ما يتشال منها حاجه عشان ترخص في السعر يعني مثلا انا حاسس في التيدا ان كان لازم يبقى فيها كروز كنترول ومرايات ضم مثلا عشان تحس باكتمال المظهر الداخلي للعربيه مع الكماليات ولكن مع الجوك الاحساس مختلف كل حاجه موجوده في مكانها وما فيش حاجه ناقصه من وجهه نظري غير فتحه سقف وده طمع طبعا بس كان ها يخللي العربيه الجوك تحفه فعلا

6- من حيث القياده:

اولا العاديه: 

الاداء متقارب نوعا ما مع تميز الجوك في النعومه عشان ما فيش احساس النقله الخفيف اللي موجود في التيدا

ثانيا الرياضي: 

طبعا نتيجه اختلاف نوع الفتيس في العربيتين وعشان فتيس الجوك مهما عملت بيحافظ على الموتور عشان مش ممكن ها تقدر تخليه يدخل في منطقه الريد زون فالاداء في الجوك جيد وليس ممتاز ولكن في التيدا عشان بتقدر تسقط نقلات بالفتيس فا بتقدر تخرج كل طاقه العربيه لحد ما توصل للريد زون طبعا مع الوضع في الاعتبار ان ده مضر على الفتيس وكمان لازم نحط في دماغنا ان الفتيس السي في تي في الجوك مش فتيس رياضي اصلا وكمان فرق الوزن اللي هو مش كبير قوي ( حوالي 85 كيلو ) وكمان الجنط ال 17 ومقاس الكاوتش الكبير في الجوك

7- الثبات: 

لصالح الجوك طبعا عشان مقاس الجنط والكاوتش العريض وكمان نظام الثبات الالكتروني اللي موجود في الجوك انما التيدا لا فيها ثبات الاكتروني ولا كاوتش عريض بس ثباتها مش ضايع يعني

8- الفرامل: 

في التيدا الفرامل جيده والجوك الفرامل ممتااااااااااااازة وطبعا ده راجع لان الجوك ورا وقدام سكاكين مع عرض الكاوتش فالعربيه مكلبشه في الارض اما التيدا ورا مش سكاكين وهما الاتنين فيهم ايه بي اس وايه بي دي بس اداء الفرامل عموما بيكون احسن لما قدام ووراء بيكون سكاكين

9- العفشه: 

العربيتين تعليقهم واحد من قدام ماكفيرسون ومن ورا تروجان بيم ولكن عفشه الجوك انشف بشكل خفيف جدا قد لا يلاحظ اصلا وده راجع لكبر حجم الكاوتش في الجوك اللي بيساعد في امتصاص الصدمات

10- العزل:

تقريبا متساوي في الاتنين

وفي النهايه ارجو اكون قدرت اعمل مقارنه بين التيدا والجوك بشكل حيادي مع الوضع في الاعتبار ان برضو ده راي شخصي ممكن يتفق او يختلف مع اراء اخرى

وانا تحت امركم في اي اسئله ما دمت اعرف اجابتها

شكرا

Read More

الفرق بين تيدا 2011 و 2010

السلام عليكم

 فيما يلي الفروقات بين تيدا 2010 الياباني و  2011 الميكسيكي وما يليها حتى 2013

------------------------------------2011------------------ 2010-----------------------------------------------

الاكصدامات------------------------------------ ساده------------------ تم تزويد شنبات

الشبكه الاماميه ------------------------ سيلفر في فراني------------ سوداء بالكامل

العدادات----------------------------------- خلفيه سيلفر -------------- خلفيه سوداء

الفرش-------------------------------------- قماش في جلد --------------قماش في قماش شامواه

السي دي------------------------------------- 6 ------------------------------ 1

مسند السائق------------------------- طويل نسبيا ------------------------ قصير نسبيا

الولاعه ------------------------------------ يوجد------------------------ لا يوجد (المكان فقط موجود)

الطفايه ---------------------------------- يوجد ------------------------- لا يوجد

التكييف ------------------------------ تاتش + شاشه مستطيله- ---------- تاتش + شاشه مستديرة

الدرج فوق السي دي------------------ عريض --------------------------- رفيع

مكان الكوبايات تحت التكييف ----------- له غطاء ---------------------- ليس له غطاء

المخدع الخلفي ---------------------- جلد ------------------------ قماش شامواه

مكان اكوبايات في ------------------- له غطاء ---------------------- ليس له غطاء

المخدع الخلفي

مكان تعديل ارتفاع ---------------- من اسفل ----------------------- من الجانب

عجله القياده

بلد المنشا ----------------------- اليابان --------------------------- الميكسيك

من وجهه نظري الشخصيه  2010 الياباني احسن من 2011 الميكسيكي ونيسان المفروض كانت تشجع ملاك السيارة   لشراء الموديل الجديد ولكن حتى الان الناس بيبحثوا عن المديلات الياباني وسوق الميكسيكي في تراجع

Read More

تركيب مسند اليد الاصلي في النيسان جوك

السلام عليكم ورحمه الله وبركاته

ما شاء الله لا قوة الا بالله

تركيب مسند اليد الاوريجينال للنيسان جوك

روحت سالت عليه في اوتو ايجيبت لقيته ب 1336 جنيه + 200 جنيه تركيب + 10% ضريبه

انا قولت احاول اوفر ثمن التركيب وقبل ما اروح اجيبه احاول اشوف ممكن يركب ازاي

لقيت الموضوع بسيط ان شاء الله فتوكلت على الله وروحت جيبته وكان السعر النهائي 1350 جنيه بعد خصم نايل موتورز والضريبه وبدون التركيب عشان انا ها اركبه بنفسي

واليكم الخطوات بالصور

1- العده المطلوبه:

- مفتاح الانكيه

- مفك صليبه

- شنيور

2- طريقه التركيب:

- اولا دي صورة للكونسول وملحقاته

- ودي صوره للكونسل قبل فكه

- يتم فك الطبق اللي في اخر الكونسول في العربيه وده سهل عن طريق رفع الكونسول لاعلى ودي عبارة عن كليبسات ضغط وبعدين نفك المسامير اللي رابطه الطبق

- وبعد ما خرجنا الطبق ها نفك الفبره الاماميه في المسند عشان نعرف نعلم مكان المسامير في الطبق

- وبعد كده ها ندخل القاعدة المسند في الطبق ونعلم مكان المسامير

- وبالشنيور نخرم مكان الثلاث مسامير

- بعد كده نركب المسامير في الخراطيم الصغيرة بتاعتها ونربطها على خفيف قوب في قاعده المسند عشان لما تدخل الخروم في الطبق ونربط بتعمل باللونه وتمسك في الطبق لان في صاموله في اخر الخرطوم بتشد عليه مع الربط ودي 

صور للمسامير والخراطيم بتاعتها عشان الفكرة توضح

- وبعد كده ندخل المسند بخراطيمه في الطبق ونبدا نربط كويس لحد ما لمسند يبقى ثابت وده دليل ان الخراطيم عملت باللونات ومسكت في الطبق

- بعد كده نركب الطبق مكانه تاني قبل تثبين المسند

- نجيب بعد كده الفيبرة اللي فكيناها من المسند ونركبها عشان تغطي على المسامير

وكده نبقى خلصنا تركيب وده المنظر بعد التركيب

ارجو تكونوا استمتعتوا بالموضوع

وانا تحت امركم في اي استفسار

Read More